"Күнөөлүүлөр катуу жазага тартылат". ИИМ Жети-Өгүздө зордукталган 9 жашар кыздын ишин өз көзөмөлүнө алды 

Ички иштер министрлиги Ысык-Көлдүн Жети-Өгүз районунда зордукталган 9 жашар секелектин ишин өз көзөмөлүнө алганын билдирди.

Маалыматка ылайык, 9-сентябрда Жети-Өгүз РИИБине 9 жаштагы кызды эки киши зордуктаганы тууралуу арыз түшкөн.

Бул факты боюнча Кылмыш-жаза кодексинин 154-беренеси (Зордуктоо) менен кылмыш иши козголгон. Окуя ички иштер министринин көзөмөлүнө алынып, бардык зарыл болгон тергөө иштерин жүргүзүү тапшырылган.

Ыкчам тергөө иш-чаралардын жүрүшүндө шектүү катары Жети-Өгүз районунун 2005-жылы туулган Э.Э. жана 1999-жылы туулган О.А. аттуу тургундары кармалып, эки айга камакка алынды.

Учурда тергөө иштери уланууда.

ИИМ мындай фактылар көңүл сыртында калбайт жана күнөөлүүлөр мыйзамга ылайык катуу жазага тартылат деп ишендирүүдө.

Кечээ Ысык-Көл облустук милициясы окуя 9-сентябрда Барскоон айылында болгонун билдирген.