Кыргыз-Казак чек арасындагы "Каркыра" өткөрүү пунктунун иштөө режимин өзгөртүү сунушталууда

Кыргыз-Казак чек арасындагы "Каркыра" өткөрүү пунктунун «күндүз» иштөө режимин «күнү-түнү» иштөө режимине алмаштыруу каралууда. Тиешелүү мыйзам долбоору бүгүн, 17-сентябрдагы Жогорку Кеңештин Эл аралык иштер, коргоо, коопсуздук жана миграция боюнча комитетинин жыйынында биринчи окууда каралып, жактырылды.

Ага Кыргызстан менен Казакстандын өкмөттөрүнүн ортосунда 19-апрелде Астанада кол коюлган. Мыйзам долбоорун УКМКнын чек ара кызматынын директору Уларбек Шаршеев тааныштырды.

"Каркыра" өткөрүү пунктунун иштөө режимине өзгөртүү киргизүү Кыргыз-Казак чек арасынан өтүүгө ыңгайлуу шарттарды түзүү жана Ысык-Көл облусунда кышкы туризмди өнүктүрүү, ошону менен бирге ички жана чет элдик туристтердин агымын көбөйтүү, инфра түзүмүн жакшыртуу зарылчылыгы менен шартталган", - деди ал.

"Каркыра-автожол" өткөрүү пункту Ысык-Көлдүн Түп районунда жайгашкан, ал 2003-жылы ачылган. Андан сырткары эки өлкөнүн ортосунда дагы төрт көзөмөл-өткөрмө бекети бар. Алар Чүйдөгү “Ак-Тилек”, “Чалдыбар”, “Ак-Жол” жана Таластагы “Чоң-Капка” өткөрмө бекеттери.