ТИМ Анкара мэриясы Ататүрк паркын реконструкциялоого макул болгонун билдирди

Кыргызcтандын Түркиядагы элчиси Руслан Казакбаев менен Анкара шаарынын мэри Мансур Яваш жолугушту. Бул туурасында ТИМ бүгүн, 17-сентябрда билдирди.

Ага ылайык, 16-сентябрда орун алган жолугушууда тараптар Мансур Яваш баштаган Анкара мэриясынын делегациясынын ушул жылдын июль айында Бишкекке болгон иш сапарынын жыйынтыгын талкуулашты.

Элчи Казакбаев Бишкекте кол коюлган Жол картасын ишке ашыруунун маанилүүлүгүн белгилеп, Ататүрк паркын реконструкциялоо долбоорлоруна, мэриялардын ортосунда тажрыйба алмашуу программасына жана “Бишкекнаабайкана” муниципалдык ишканасынын жабдууларын модернизациялоого өзгөчө көңүл бурду.

Яваш Ататүрк паркын реконструкциялоо долбоору буга чейин Анкара шаардык кеңешинен макулдук алганын айтып, кыргыз тарап менен кызматташууну жигердүү улантууга даяр экенин билдирди.

Жолугушуунун жыйынтыгында тараптар жетишилген макулдашуулардын алкагында жигердүү кызматташууну жана Бишкек шаарынын мэринин Анкарага иш сапарын уюштурууну макулдашты.