Казакстандын улакчылары "Биримдик кубогун" ойноо үчүн Кыргызстанга келе алышпайт 

Казакстандын көк бөрү жана көкпар курамалары Кыргызстандын курамалары менен "Биримдик кубогун" ойноо үчүн Кыргызстанга келе алышпайт. Бул тууралуу казак басылмалары билдиришти.

"Ысык-Көлдүн жээгинде өтүүчү "Биримдик кубогуна" федерация катыша албайт, анткени аталган даталарга башка маанилүү мелдештер пландалган. Учурда оюнчулар ошол мелдешке даярдык көрүшүүдө", - деп айтылат маалыматта.

Белгилей кетсек, буга чейин Кыргызстандын Көк бөрү федерациясы казакстандык улакчыларды "Биримдик кубогуна" чакырган. Мелдеш Чолпон-Атада 1-ноябрга белгиленген. Анда көчмөндөр оюндарынын финалында беттешкен эки өлкөнүн көк бөрү жана көкпар боюнча курамалары ойномок.