"Кадыр-баркыбызга шек келип жатат". Кундузбек Сулайманов ага мугалимдер кайрылганын айтты

Бүгүн, 19-сентябрдагы Жогорку Кеңештин жыйынында депутат Кундузбек Сулайманов мугалимдерди ишембиликтерге чыгарбоону сунуштады.

Анын айтымында, ага аймактагы мугалимдер окутуучулук кадыр-баркка шек келип жатканын айтып кайрылышкан.

"Бизде ишембилик деген нерсе болуп жатпайбы. Ошол ишембиликтерге мугалимдерди көп эле алып чыга бербесек. Себеби ал жерде мугалимдер дагы таштанды чогултушат, шыпырышат. Бул нерсе окуучулардын алдында мугалимдердин кадыр-баркын түшүрөт. Тескерисинче, аларга шарт түзүп берип, аброюн көтөргөнгө аракет кылсак. Бул боюнча жергиликтүү бийлик өкүлдөрүнө дагы тапшырмаларды берсек", - деди Сулайманов.