Ысык-Атада тургун уурулукка барган жаранды кармап алды 

Чүй облустук милициясы Ысык-Ата районунда уурулукка шектүү жаран кармалганын билдирди.

Андагы маалыматка ылайык, бүгүн, 21-сентябрда интернетте тургун үйүнө ууруга кирген адамды кармап алгандыгы боюнча видео тараган.

Бул факты Ысык-Ата РИИБдин маалыматтардын электрондук каттоо журналына катталган. Шектүү катары 31 жаштагы Т.Э. аттуу жаран ички иштер бөлүмүнө алып келинген.

Анда 21-сентябрга караган түнү шектүү Мерседец-Бенц үлгүсүндөгү унаасы менен Рухий-Мурас 2 конушундагы үйлөрдүн биринен электр зымдарын урдап жаткан жеринен үйдүн ээси кармап, милиция кызматкерлери келгенге чейин кое бербей турганы белгилүү болгон.

Окуя боюнча Кылмыш-жаза кодексинин 37-205-беренесинин (Уурдоого аракеттенүү) негизинде кылмыш иши козголуп, сотко чейинки териштирүү иштери жүргүзүлүүдө.

Тергөөнүн жыйынтыгы менен шектүүгө юридикалык баа берилет.