Садыр Жапаров Германиянын федералдык канцлери Олаф Шольц менен жолугушту  

Кечээ, 22-сентябрда президент Садыр Жапаров Нью-Йорк шаарында (АКШ) өтүп жаткан Келечек саммитинде Германиянын федералдык канцлери Олаф Шольц менен жолугушту. Бул тууралуу президенттин маалымат кызматынан билдиришти.

Маалыматка ылайык, анда экономикалык, инвестициялык жана билим берүү чөйрөлөрүндө кыргыз-герман кызматташтыгын тереңдетүү маселелери талкууланды.

Мамлекет башчысы Германияга туруктуу өнүгүү жана социалдык-экономикалык реформалар жаатындагы ар дайым колдоосу үчүн ыраазычылык билдирди.

"Федералдык канцлер Олаф Шольц өз кезегинде Германия Кыргызстан менен өнөктөштүктү өнүктүрүүгө даярдыгын билдирип, өлкөнүн Борбор Азиядагы негизги өнөктөшү катары маанилүүлүгүн белгиледи", - деп айтылат маалыматта.

Мындан тышкары тараптар кызматташтыкты өнүктүрүү келечегин талкуулап, регионалдык маселелерди чечүү боюнча демилгелерди колдошту.