Кытай менен Кыргызстанда ГЭСтерди куруу боюнча кызматташуу талкууланды

Министрлер кабинетинин төрагасынын орун басары Бакыт Төрөбаев Кытайдын Хубэй провинциясында жайгашкан дүйнө жүзүндөгү эң ири гидроэлектростанция делген “Үч капчыгайга” барды. Бул тууралуу бүгүн, 23-сентябрда өкмөттүн басма сөз кызматынан билдирди.

Маалыматка ылайык, тараптар гидроэнергетика тармагындагы кыргыз-кытай кызматташтыгынын актуалдуу маселелерин талкуулап, андан соң кытай тарапка Кыргызстанга келип кетүүгө жана ГЭСтерди куруу мүмкүнчүлүгүн карап көрүү сунушталды.

Кыргызстандан барган делегациясынын курамындагы энергетика министри Таалайбек Ибраев жана өлкөнүн энергетикалык компанияларынын жетекчилери менен адистерине Хубэй провинциясынын Тышкы байланыштар департаментинин жетекчилиги жана кытайлык энергетиктер “Үч капчыгай” ГЭСи тууралуу маалымат беришти.

“Үч капчыгай” Кытайдын Янцзы дарыясында жайгашкан дүйнөдөгү эң чоң ГЭС. Кытайлык энергетиктердин айтымында, гидроэлектростанциянын жалпы кубаттуулугу 22 миң 250 МВт. Плотинанын бийиктиги 185 метр, узундугу 2,3 чакырым.