УЕФА эки айдан кийин Германия-Испания беттешинде пенальти болмок экенин жарыялады

УЕФА уюмунун калыстар комитети Евро-2024 турниринин чейрек финалындагы Германия менен Испаниянын беттешинде калыстын пенальти бербөө чечимин жаңылыш деп тапты. Бул тууралуу чет элдик спорттук басылмалар жазышты.

Беттештин кошумча убактысында айып аянтчадагы топ испаниялык коргоочу Марк Кукурельянын колуна тийип, бирок калыс Энтони Тейлор пенальти берген эмес. Жыйынтыгында испаниялыктар 119-мүнөттө гол киргизип, жарым финалга чыгып кеткен.

"Бул учурда коргоочу дарбазага таамай узатылган соккуну денесине өтө жакын абалдагы колу менен токтоткон. Ошондуктан пенальти берилиши керек болчу", - деп билдирген УЕФА уюму.

Испания курама командасы финалда англиялыктарды 2:1 эсебинде утуп, Европа чемпиондугун жеңип алган.