Өкмөт мындан ары турак жай кооперативдеринин ишин көзөмөлдөйт

Министрлер кабинети "Турак жай - курулуш кооперативдеринин ишин көзөмөлдөө боюнча ыйгарым укуктуу орган жөнүндө" жобо бекитти. Бул тууралуу бүгүн, 24-сентябрда өкмөттүн басма сөз кызматынан билдирди.

Кабыл алынган токтомго ылайык, кооперативдердин ишин көзөмөлдөө боюнча ыйгарым укуктуу орган катары Юстиция министрлиги, Ички иштер министрлиги жана Улуттук банк аныкталды.

"Токтом турак жай кооперативдерин натыйжалуу жана сарамжалдуу башкарууну камсыз кылуу үчүн принципиалдуу жаңы мамилелерди колдонуу зарылчылыгын чечүү максатында иштелип чыкты.

Буга чейин турак жай кооперативдерине салынган салымдардын натыйжасында топтолгон акча каражаттарын жоготкон жарандардын саны өсүп, укук коргоо органдарына бул боюнча кайрылуулар көбөйүүдө", - деп айтылат маалыматта.