Парламентте "Элдик курултай жөнүндө мыйзамга өзгөртүү киргизүү" боюнча мыйзам долбоору өтпөй калды

Бүгүн, 25-сентябрдагы Жогорку Кеңештин жыйынында "Элдик курултай жөнүндө конституциялык мыйзамга өзгөртүүлөрдү киргизүү" тууралуу мыйзам долбоору биринчи окууда каралып, колдоо тапкан жок.

Жыйында Депутат Камила Талиева мыйзам долбоорун талкуулабай эле, добушка коюу сунушун берди. Натыйжада депутаттын сунушу колдоого алынып, документ добуш берүүгө коюлду. Добуш берүүдө 8 депутат "макул", 59 депутат "каршы" добуш берип, мыйзам долбоору өтпөй калды.

Эске салсак, кечээ, 24-сентябрда парламенттин Конституциялык мыйзамдар, мамлекеттик түзүлүш, сот-укук маселелери боюнча комитетинин отурумунда аталган мыйзам долбоору каралып, биринчи окууда колдоо тапкан болчу.

"Элдик курултай жөнүндө конституциялык мыйзамга өзгөртүү киргизүү" боюнча мыйзам долбоору быйыл март айында коомдук талкууга коюлган. Анда 700 делегат курултайды өткөрүү мезгилине гана шайланса, эми аларды бир жылдык мөөнөткө шайлоо сунушу жазылган.