АКШ Израиль үчүн Иран менен согушууга даяр экенин билдирди

АКШ президентинин Улуттук коопсуздук боюнча жардамчысынын башкы орун басары Жон Файнер АКШ Иран менен согуштук аракеттер болгон учурда Израилди коргоого даяр экенин билдирди. Бул тууралуу чет элдик басылмалар жазды.

"Биз Израилди апрель айында Ирандын кол салуусунан коргодук жана Иран Израилге кол салууга дагы аракет кылса, биз дагы ушундай кылууга даярбыз", - деген Файнер Axios порталы уюштурган иш-чарада сүйлөгөн сөзүндө.

Файнер ошондой эле Ливандагы кырдаалга тынчсыздануусун билдирип, азыркы конфликттин толук масштабдуу согушка айланып кетиши мүмкүн экендигин белгиледи. Анын айтымында, "чоң масштабдагы согуш Израилдин кызыкчылыгына туура келбейт" жана Кошмо Штаттар кырдаалды, анын ичинде БУУнун Башкы Ассамблеясынын алкагында деэскалациялоо үчүн иштеп жатат.

Бул билдирүү 17-18-сентябрда Ливанда болгон бир катар жардыруулардан кийин Израиль менен "Хезболланын" ортосундагы жаңжал күчөгөн маалда айтылды. Израилдин Ливанга кийинки соккуларынын натыйжасында жергиликтүү саламаттыкты сактоо министрлигинин маалыматына караганда, 570тен ашык адам набыт болуп, 1800дөн ашууну жарадар болгон.

Эске салсак, үстүбүздөгү жылдын апрель айында Иран Израилге масштабдуу чабуул жасап, анын мизин кайтарууга АКШ жардам берген. Кийинчерээк Израиль Иранда жооп кайтаруу операциясын жүргүзгөн.