"Сосновка" постунан Бишкекке баңгизат ташып бараткандар кармалышты

Бишкек шаарына сатуу үчүн Токтогулдан гашиш баңгизатын алып келе жаткан шектүүлөр кармалды. Бул тууралуу бүгүн, 26-сентябрда Ички иштер министрлиги билдирди.

Маалыматка ылайык, 20-сентябрда "Сосновка" постунан өтүп бара жаткан Daewoo Nexia үлгүсүндөгү унаа токтотулуп, текшерүүгө алынган. Жыйынтыгында автокөлүктүн ичинен 475 грамм болгон гашиш баңгизаты табылган.

Тергөөнүн жүрүшүндө айдоочу М.И. жана анын Т. У., С. К. аттуу шериктери Токтогул районунда даярдалган баңгизатты Бишкек шаарына сатууну көздөп алып келе жатышканын айтышкан.

Кармалгандар Жайыл райондук сотунун чечими менен 2 айга камакка алынышты.