Казакстанда өзүнүн ички органын сатууга аракет кылган жаран кармалды

Коңшу Казакстандын Актөбө облусунда адамдын органын мыйзамсыз сатуу аракети аныкталды. Бул тууралуу Казакстандын жергиликтүү басылмалары жазышты.

Актөбө облустук прокуратурасынын кызматкерлери интернет мейкиндигине мониторинг жүргүзүү учурунда ички органдарды сатуу боюнча жарнама тууралуу маалыматты аныкташкан.

"25-сентябрда прокуратура органдары тарабынан жүргүзүлгөн ыкчам издөө иш-чараларынын алкагында өзүнүн ички органын 9 миллион теңгеге сатууга аракет кылган Е. аттуу жаран кармалды", - деп билдиришкен прокуратурадан.

Бул факты боюнча Кылмыш-жаза кодексинин 116-беренесинин 1-бөлүгү менен сотко чейинки иликтөө иштери башталып, тергөө амалдары жүрүп жатат.