"Asman Airlines" учагы Бишкек-Ош каттамын ийгиликтүү аткарды  

“Asman Airlines” мамлекеттик авиакомпаниясынын учагы Бишкек–Ош багыты боюнча алгачкы каттамын аткарып, 80 жүргүнчү учуп кетти. Бул тууралуу бүгүн, 27-сентябрда "Манас" эл аралык аэропортунан билдиришти.

Билеттин минималдуу баасы 3300 сомду түзсө, акыркы 5 орунга супер эконом — 4000 сом, толук эконом — 4500 сом жана флекс эконом — 5000 сомдук атайын тарифтер сунушталат.

Каттамдар Ош шаарына 27-сентябрдан, Жалал-Абад шаарына 28-сентябрдан, Баткенге 3-октябрдан башталат.

"Учак жүргүнчүлөргө толуп, авиабилеттерге болгон суроо-талаптын көптүгүнө байланыштуу Казарман, Раззаков жана Талас багыты боюнча каттамдарга авиабилеттерди сатуу убактылуу токтотулду", - деп айтылат маалыматта.

Эске салсак, буга чейин 6-сентябрда Кыргызстандын ички каттамдары үчүн Канададан сатылып алынган учактардын алгачкысы “Манас” эл аралык аэропортуна конгон.