Глобалдык кеңештин эксперттери жаңы Ак үйгө "фантастикалык" деп баа беришти

Министрлер кабинетинин төрагасы Акылбек Жапаров креативдик экономика боюнча Глобалдык кеңештин эксперттери менен жолугушуу өткөрдү. Бул тууралуу өкмөттүн басма сөз кызматынан билдирди.

Маалыматка ылайык, Жапаров өлкөнүн туруктуу өнүгүүсүнө жетишүү боюнча пландары менен бөлүшүп, 2030-жылга карата ИДПнын көлөмүн 30 миллиард долларга жеткирүү максатын белгилеп, аны “илбирсттин секириги” деп атады.

"Кеңештин эксперттери креативдүү индустриянын маанилүүлүгүнө берген жогорку баасы үчүн өкмөт башчыга ыраазычылык билдиришип, Президенттин администрациянын жаңы имаратына "фантастикалык" деп жогору баа беришти.

Мындан тышкары алар Кыргызстандын креативдүү индустриясына кызыгуусун билдирип, креативдүү экономика тездик менен өсүп, жумуш орундарын түзүп жатканын, ошондой эле башка тармактардын өнүгүшүнө түрткү болуп жатканын белгилешти", - деп айтылат маалыматта.

Кеңештин эксперттери өз тажрыйбалары менен бөлүшүп, креативдүү экономиканы өнүктүрүүнүн дүйнөлүк тенденцияларын талдап, аны Кыргызстанда өнүктүрүү боюнча бир катар сунуштарды беришти.

Акылбек Жапаров эксперттердин иш сапары үчүн ыраазычылык билдирип, алардын кеп-кеңештери жана сунуштары Кыргызстан үчүн чоң мааниге ээ экенин баса белгиледи.