Украинанын Жогорку сотунун судьясы дрон чабуулунан набыт болду

Украинанын Жогорку сотунун судьясы Леонид Лобойко Харьков облусунда орусиялык учкучсуз учактын чабуулунан каза болду. Бул тууралуу чет элдик ЖМКлар Украинанын Жогорку сотуна таянып жазып чыгышты.

Маалыматка караганда, кылмыш иштери боюнча кассациялык соттун судьясы болгон Лобойко унаа айдап, жергиликтүү тургундарга гуманитардык жардам жеткирип жаткан учурда анын унаасына дрон тийген. Ал ошол жерден каза болгон. Кол салууда үч аял дагы жарадар болгону айтылат.

Харьков облустук прокуратурасы дрондун соккусу 61 жаштагы судья айдаган жарандык унаага багытталганын ырастады.

Ошол эле күнү орусиялык соккулар Слатино кыштагына да тийип, үч киши набыт болуп, дагы үчөө жарадар болгон.