АКШ, Орусия жана Кытай Насралланын өлтүрүлүшү тууралуу үн катты

АКШнын президенти Жо Байден Израилдин Иран колдогон “террордук топтордон” өзүн-өзү коргоо укугун толук колдой турганын билдирди. Байден "Насралла жана анын тобу 40 жылдык террордук аракеттери учурунда жүздөгөн америкалыктардын өлүмүнө жооптуу" деп баса белгиледи. Ал ошондой эле Кошмо Штаттар Газа жана Ливандагы жаңжалдарды дипломатиялык жол менен жөнгө салууга умтулуп жатканын айтты.

"Жыйынтыктап айтканда, биздин максатыбыз Газадагы жана Ливандагы азыркы кагылышуулардын интенсивдүүлүгүн дипломатиялык жол менен азайтуу, - деди Байден.

Орусиянын Тышкы иштер министрлиги Насралланын өлтүрүлүшүн кескин айыптап, муну “дагы бир саясий киши өлтүрүү” деп атады. Министрлик аймак үчүн мүмкүн болуучу кесепеттерди эскертип, Израилди согуштук аракеттерди токтоосуз токтотууга чакырды.

"Биз дагы бир жолу Израилди согуштук аракеттерди токтоосуз токтотууга чакырабыз. Бул кан төгүүнү токтотууга жана саясий-дипломатиялык жол менен жөнгө салууга шарт түзүүгө мүмкүндүк берет", - деп белгиледи Орусиянын Тышкы иштер министрлиги.

Кытайдын тышкы иштер министри Ван И БУУнун Башкы ассамблеясында сөз сүйлөп жатып, жаңжалдын күчөшүн кыйыр түрдө айыптап, бирок Израилди түз айткан жок.

"Ливанда согуш кайрадан башталды, бирок күч адилеттүүлүктү алмаштыра албайт", - деди Ванг.

"Хезболланын" лидери Хасан Насралла израилдик күчтөр жүргүзгөн масштабдуу аскердик операциянын натыйжасында каза болгон.