Жаңы "Аккула" ат майданы Военно-Антоновка айыл аймагына курулат

Жаңы "Аккула" ат майданы Сокулук районундагы Военно-Антоновка айыл аймагына курула турган болду. Бул тууралуу Мамлекеттик сатып алуулар порталында маалымдалды.

Маалыматка ылайык, ат майданды курууга 31 миллион 85 миң сом сарптоо пландалууда. Ал эми тендер боюнча арыздар 14-октябрга чейин кабыл алынат.

Ат майдандын жалпы аянты 224,8 гектарды түзөт. Көрүүчүлөр үчүн 30 миң орундук жана миңден ашык унаа токтой турган жай салынары айтылды. Мындан тышкары 500 орундуу мейманкана, 1000 орундуу ашкана, 20 жылкыга ылайыкталган аткана, даараткана, административдик имарат салынары пландалып жатат.

Белгилей кетсек, буга чейин Бишкектеги эски "Аккула" ат майданынын ордуна "Москва-Сити" сыяктуу борбор курула турганы айтылган.