Байден Жакынкы Чыгышта согуш болтурбоого чакырды

АКШнын президенти Жо Байден ондогон адамдардын, анын ичинде "Хезболланын" лидери Хасан Насралланын өмүрү кыйылган Израилдин Ливандагы бир катар аба чабуулдарынан кийин Жакынкы Чыгышта кеңири масштабдагы согушту болтурбоо зарылдыгын айтты. Бул туурасында чет элдик басылмалар жазды.

"Биз чындап эле мындан качышыбыз керек", - деген Байден журналисттерге.

Ошондой эле ал Израилдин премьер-министри Биньямин Нетаньяху менен сүйлөшүү ниетин билдирди.

Ливандагы кырдаал курч бойдон калууда. Ливандын премьер-министри Нажиб Микатинин айтымында, миллионго жакын адам үй-жайын таштап кетүүгө аргасыз болду.

Ливандын Саламаттыкты сактоо министрлиги Израилдин 23-сентябрдан берки бомбалоосунан 816 киши өлүп, 2500дөн ашууну жарадар болгонун билдирди. Былтыр жаңжал башталгандан бери жалпысынан 1673 адам набыт болгон, алардын 194ү аялдар жана 104ү балдар.