Депутаттар Түштүк Кореядагы элчинин ишин текшерүү үчүн комиссия түзмөй болушту

Бүгүн, 30-сентябрдагы Жогорку Кеңештин Эл аралык иштер, коргоо, коопсуздук жана миграция боюнча комитетинин жыйынында депутат Кубанычбек Самаков өлкөнүн Түштүк кореядагы элчиси Аида Исмаилованын ишмердүүлүгүн текшерүү үчүн депутаттык комиссия түзүүнү сунуштады.

Ал комиссия УКМКнын кызматкерлеринен дагы кошуу керектигин белгиледи.

"Азыр ЖМКларда анын ишмердүүлүгү тууралуу чоң талкуу жүрүп жатат. Биз тармактык комитет катары депутаттык комиссия түзсөк. Комиссияга атайын кызматтын өкүлдөрүнөн дагы кошуш керек. Аткени бизге Түштүк Кореядан жарандарыбыз, Кыргызстанга инвестиция алып келебиз дегендер кайрылып жатат", - деди Самаков.

Жыйынтыгында депутаттар Самаковдун сунушун бир добуштан колдошту.