"1,5 миллион сомдук зыян келтирген". Ошто мал уурулукка шектелип 5 жаран кармалды

Ош облусунун Өзгөн районунда мал уурулук менен алектенген 5 жаран кармалды. Бул туурасында бүгүн, 30-сентябрда Ош ОИИБинин басма сөз кызматы билдирди.

Маалымдалгандай, 18-сентябрда Өзгөн райондук ички иштер бөлүмүнө Салам-Алик айыл аймыгынын 1989-жылы туулган А.Э. аттуу тургуну арыз менен кайрылган. Анда сентябрь айында 4 баш малын белгисиз атуулдар уурдап кетишкендигин билдирген. Ушундай эле мазмундагы арыздар менен дагы 7 атуул кайрылган. Жалпы 16 баш мал уурдалган.

Бул факт боюнча Кылмыш-жаза кодексинин 205¹-беренеси (Мал уурдоо) боюнча кылмыш иши козголуп, ыкчам тергөө амалдары башталган.

Кылмышка шектүү катары Ош шаарынын 1991-жылы туулган Х.О. 2001-жылы туулган М.Ж., 2001-жылы туулган С.У., 2005-жылы туулган А.А., 2005-жылы туулган Х.А. аттуу тургундары кармалып, камакка алынган.

"Жабырлануучуларга келтирилген зыяндын болжолдуу суммасы 1 миллион 500 миң сомду түзөт. Уурдалган малдардын 9 башы ээлерине кайтарылып, калгандарын башка аймактардагы базарларга алып барып сатып жибергени маалым болгон", - деп айтылат маалыматта.

Учурда тергөө иштери уланууда.