Кыргызстан Ооганстанга гуманитардык жардам жеткирди

Кыргызстандан Ооганстанга 25-сентябрда жөнөтүлгөн 120 тонна азык-түлүк гуманитардык жардам 28-сентябрда жергиликтүү бийликтин кампасына жеткирилди. Бул тууралуу бүгүн, 30-сентябрда ӨКМден билдиришти.

Маалыматка ылайык, гуманитардык жардам президент Садыр Жапаровдун тапшырмасы менен жеткирилди.

Белгилей кетсек, Садыр Жапаров үстүбүздөгү жылдын февраль айында бир нече өлкөлөрдүн Коопсуздук кеңештеринин башын бириктирген регионалдык жыйында, БУУнун 75-сессиясында да Ооганстанга жардам берүүгө чакырык таштаган.

"Кыргызстандан буга чейин да аталган өлкөгө азык-түлүк, кийим-кечелер, балдар үчүн оюнчуктар жана дары-дармектер жеткирилген", - деп айтылат маалыматта.