Таиландда мектеп автобусу өрттөнүп, 25 адам каза болду

Бангкоктун четинде 40тан ашык окуучу менен мугалимдерди ташып бара жаткан мектеп автобусу күйүп кеткен. Бул тууралуу чет элдик басылмалар жазышууда.

Утхай-Тхани провинциясынан келе жаткан автобус дөңгөлөгү жарылгандан кийин тосмону сүзгөн. Анда күйүүчү май бактары жарылган. Натыйжада катуу өрт чыккан.

Алдын ала маалыматтар боюнча, 44 жүргүнчүнүн 25ке жакыны каза болгон, бирок транспорт министри Сурия Жуангрунгруангкит курман болгондордун так саны дагы эле тактала электигин билдирди. Андан тышкары 16 окуучу жана үч мугалим жаракат алып, ооруканага жаткырылган.

Маалыматка ылайык, автобуста башталгыч жана орто класстын окуучулары болгон.