Футбол боюнча улуттук кураманын кеңейтилген тизмеси жарыяланды

Максим Лисицын жетектеген Улуттук кураманын машыктыруучулар штабы, октябрь айында өтө турган оюндарга даярдык көрүү максатында окуу-машыгуу жыйынына чакырыла турган оюнчулардын кеңейтилген тизмесин жарыялады. Бул туурасында Кыргыз футбол биримдиги билдирет.

Маалымдалгандай, окуу-машыгууга 30 оюнчу барат. Соңку тизмеге 23 футболчу тандалып алынат.

Белгилей кетсек, улттук курама 3-8-октябрга чейин Сауд Арабиясынын Жидда шаарында машыгууларын өткөрүп, андан ары Катарга бара тургандыгы айтылган.

Курама команда 2026-жылы өтө турган Дүйнө чемпиондугунун тандоо турунун алкагында 10-октябрда конокто Катар курама командасы менен, ал эми 15-октябрда өз үйүндө Түндүк Корея менен ойнойт.