Тазабек Икрамовдун ордуна жаңы депутат болуп келген Алтынбек Кылычбаев ант берди

Бүгүн, 2-октябрдагы Жогорку Кеңештин жыйынында №13 бир мандаттуу Сузак округунан шайланып келген Алтынбек Кылычбаев ант берип, кызматына киришти.

Ошондой эле ал "Ата Журт-Кыргызстан" фракциясынын курамына кирди.

Борбордук шайлоо комиссиясы ага 30-сентябрда белгиленген үлгүдөгү күбөлүк жана төш белги тапшырган. Ал өз арызынын негизинде мандатын тапшырган Тазабек Икрамовдун ордуна шайланып келди.

19-июлда БШК Икрамовдун ыйгарым укуктарын өзү жазган арыздын негизинде токтоткон. Эл өкүлү ага чейин УКМКга сурак берип чыккан.

Алтынбек Кылычбаев 1977-жылы 11-июлда Жалал-Абад облусунун Сузак районуна караштуу Ленин айылында туулган.

2023-жылдын май айынан бери "Жалал-Абад" санаториясынын директорунун орун басары кызматын аркалап келген.