Эмгек министри 100 миң сомдон алгандардын айрымдары жакшы киреше таап жатканын айтты

Бүгүн, 2-октябрдагы Жогорку Кеңештин жыйынында эмгек, социалдык камсыздоо жана миграция министри Жылдыз Полотова "социалдык контракт" аркылуу аз камсыз болгон үй-бүлөлөргө жеке ишин ачуу үчүн берилген сумманы жакшы иштетип, айына 20 миңден 40 миң сомго чейин киреше таап жаткандар бар экенин билдирди.

Жыйында "Социалдык чөйрөдөгү Кыргыз Республикасынын айрым мыйзам актыларына өзгөртүүлөрдү киргизүү жөнүндө" мыйзам долбоору 2-окууда каралып жатат.

"Социалдык контракт" алгандардын 38 пайызы 20 миң сом өлчөмүндө киреше таап жатышат. 40 миң сомдон жогору тапкан үй-бүлөлөр дагы бар. Учурда мамлекет тарабынан 100 миң сом кайтарымсыз берилип жатат. Ал эми 200 миң сом бизнесин улап кетүү үчүн берилет. Бул сумма насыя катары берилгендиктен кайра кайтарып бериши керек. Бирок мамлекет жардам кылып, анын үстөк пайызын төлөп жаткандыктан 3 жылдан кийин 200 миң сомду эле берип калышат", - деди Полотова.