"УКТнын мүчөсү курал саткан". Милиция шектүү маркум Көлбаевдин Таластагы көзөмөлдөөчү болгондугун билдирди

Маркум Камчы Көлбаевдин уюшкан кылмыштуу тобунун мүчөсү "Баха" кармалды. Бул туурасында бүгүн, 7-октябрда ИИМдин маалымат кызматы билдирди.

Маалымдалгандай, милицияга "Баха" аттуу жаран ок атуучу курал сатуу аракетин кылып жүргөнү белгилүү болгон. Ага Кылмыш-жаза кодексинин 267-беренеси (ок атуучу куралды сактоо) менен кылмыш иши козголгон.

Бишкек шаарынын аймагында атайын операция жүргүзүлүп, анын жүрүшүндө Талас облусунун 1981-жылы туулган Э.Б. аттуу тургуну кармалган. Ал Камчы Көлбаевдин уюшкан кылмыштуу тобунун активдүү мүчөсү катары ИИМдин ыкчам каттоосунда турат жана Талас облусу боюнча көзөмөлдөөчүсү болгондугу маалыматта кошумчаланган.

Тинтүү учурунда анын жанынан номери өчүрүлгөн Макаров үлгүсүндөгү тапанча жана 7 грамм болгон «гашиш» баңгизаты табылып, алынган.

Учурда убактылуу кармоочу жайга киргизилип, тергөө иштери уланууда.