Фу Минг эсиңиздеби? Ал кайрадан "Ак шумкарлардын" оюнуна калыс катары кошулду

Футбол боюнча Дүйнө чемпиондугуна тандап алуу оюндарынын алкагындагы Катар–Кыргызстан беттешинде сингапурлук калыс башкы калыстын милдетин аткарат. Бул тууралуу Кыргыз футбол союзу кабарлады.

"Аль-Тумама" стадионунда өтө турган оюнду сингапурлук Мухаммад Бин Жахари тейлейт. Ага капталдан мекендештери Абдул Бин Хасим жана Энди Минт Лант жардам беришет.

Ошондой эле VAR-системасында япониялык Ийда Жумпей менен кытайлык Фу Минг отурат.

2019-жылы өткөн Азия кубогунда Кыргызстан–ОАЭ беттешинде дал ушул Фу Минг башкы калыс болгон. Анда Фу Минг бир нече талаштуу чечимдерди кабыл алып, көпчүлүк кыргыз күйөрмандарынын нааразычылыгын жараткан.

ФИФАнын эл аралык калысы Бахадыр Кочкаровдун пикиринде, БАЭнин биринчи голу офсайд абалында кирген. Ошондой эле Кыргыз курамасынын дарбазасына коюлган 11 метрлик айып сокку туура эмес коюлган.