"Акысыз болот". Өлкөдө экинчи чейректен баштап окуучулар электрондук күндөлүк колдоно баштайт

Экинчи чейректен тарта мектептерде билим берүү процессин башкарууну, билим берүүнүн сапатын баалоону жана окуу-методикалык материалдарды бириктирген биринчи улуттук портал болгон электрондук күндөлүк пайдаланыла баштайт. Бул туурасында бүгүн, 8-октябрда Билим берүү жана илим министрлигинин маалымат кызматы билдирди.

Маалымдалгандай, электрондук күндөлүк ачык-айкындуулукту жогорулатууга, мектеп, окуучулар жана алардын ата-энелери ортосундагы өз ара байланышты жакшыртууга, ошондой эле окуу процессин оптималдаштырууга мүмкүндүк берет.

Электрондук күндөлүктү колдонуунун негизги артыкчылыктары:

1. Маалыматка оңой жетүү;

2. Окуу процессинин ачыктыгы;

3. Google Classroom менен интеграциялоо;

4. Маалыматтарды автоматташтыруу;

5. Окуу-методикалык комплексти санариптештирүү;

6. Бардык колдонуучулар үчүн акысыз кирүү.

"Бул бардык окуучуларга материалдык абалына карабастан бирдей мүмкүнчүлүктөрдү камсыздап, билим сапатын жакшыртуу үчүн ар бир адамга заманбап санариптик чечимдерди колдонууга мүмкүндүк берет. Электрондук күндөлүк – бул билим берүү тармагында санариптик башкарууга толук өтүү жолундагы маанилүү кадам болуп саналат", - деп кошумчаланган маалыматта.

Министрлик электрондук күндөлүк окуучулар жана алардын ата-энелери, мектептер үчүн акысыз боло тургандыгын маалыматта баса белгилеген.