"Акчаңарды көбөйтүп берем". Таласта жарандарды миллиондогон сомдорго алдаган шектүү аял кармалды

Талас шаарынан жарандардын акчасын алдап алууга шектелген аял кармалды. Бул тууралуу Талас облустук ички иштер башкармалыгы билдирди.

Маалыматка ылайык, милицияга 2 жаран арыз менен кайрылган. Алардын бири 2022-жылдын 1-декабрь күнү аял киши "акчаңды көбөйтүп берем" деген убадасы менен 2 миллион 155 миң 500 сомун алып, бербей кеткенин айткан. Экинчиси 2020-жылдын март айында шектүү аялга 1 миллион 700 миң сомун алдатып ийгенин билдирген.

Бул фактылар боюнча Кылмыш-жаза кодексинин 209-беренеси (Алдамчылык) менен кылмыш иши козголгон.

Шектүү катары Талас шаарынын 57 жаштагы тургуну кармалып, убактылуу кармоочу жайга киргизилди. Милиция кармалган аялдын үстүнөн түшкөн 8 арыз боюнча териштирүү иштери жүрүп жатканын белгиледи.

Учурда тергөө иштери уланууда.