Садыр Жапаров иш сапар менен Түркмөнстанга жөнөп кетти

Президент Садыр Жапаров бүгүн, 11-октябрда иш сапар менен Түркмөнстанга жөнөп кетти. Бул тууралуу мамлекет башчысынын администрациясы кабарлады.

Ага ылайык, өлкө башчысы Ашхабадда түркмөн акыны жана философу Махтумкули Фрагинин 300 жылдыгына арналган “Мезгил менен цивилизациялардын өз ара байланышы – тынчтыктын жана өнүгүүнүн негизи” аттуу эл аралык форумуна катышат.

Маалыматта Жапаров Түркмөнстандын президенти Сердар Бердымухамедовдун чакыруусу менен Ашхабад шаарына кеткени белгиленет.

Расмий делегациянын курамындагылар:

- тышкы иштер министри Жээнбек Кулубаев;

- Президенттин администрациясынын тышкы саясат бөлүмүнүн башчысы Муратбек Азымбакиев;

- маданият, маалымат, спорт жана жаштар саясаты министри Алтынбек Максүтов;

- Кыргызстандын Түркмөнстандагы атайын жана ыйгарым укуктуу элчиси Азизбек Мадмаров.