Жапаров жана Текебаев Мюнхенде Марк Венчик менен жолукту

Министрлер кабинетинин төрагасы Акылбек Жапаров Мюнхенге болгон иш сапарынын алкагында “АКА-Банктын” башкаруучу директору Марк Венчик менен жолукту.

Өкмөттүн басма сөз кызматынан билдиргендей, жолугушуунун жүрүшүндө үстүбүздөгү жылдын июнь айында Франкфурт-на-Майне шаарында “АКА-Банктын” көмөгү менен өткөн кыргыз-герман бизнес-форумунун алкагында жетишилген макулдашууларды ишке ашыруунун жүрүшү талкууланды.

Жапаров өлкө жетекчилигинин жарандардын бакубаттуулугун жогорулатуу жана экономиканы өнүктүрүүнүн жаңы механизмдерин киргизүү, ири инфраструктуралык долбоорлорду ишке ашыруу боюнча жигердүү аракеттерин белгиледи.

Венчик өз кезегинде Кыргызстан менен “АКА-Банктын” ортосундагы кызматташуунун маанилүүлүгүн айтып, банк өлкөнүн экономикасын өнүктүрүүгө багытталган демилгелерди жана долбоорлорду колдоого даяр экенин билдирди.

Тараптар келечекте ишке ашыруу үчүн өз ара пайдалуу долбоорлорду, ошондой эле каржылоонун ылайыктуу моделдерин биргелешип издөөнү макулдашты.