БУУ Борбордук Азиядагы үч өлкөнүн үй-бүлөлүк зомбулукту жоюу жөнүндө резолюциясын колдоду

Бириккен улуттар уюмунун адам укуктары боюнча кеңешинин 57-сессиясынын алкагында, тийиштүү мүчө мамлекеттер үй-бүлөдөгү зомбулукту жоюуга багытталган резолюцияны бир добуштан кабыл алышты. Бул туурасында бүгүн, 11-октябрда Кыргызстандын тышкы иштер министрлигинен билдирди.

Маалымдалгандай, Казакстан, Кыргызстан жана Өзбекстан тарабынан иштелип чыккан демилге кеңештин бардык мүчө өлкөлөрүнүн колдоосуна ээ болуп, аталган теманын эл аралык аренада маанилүүлүгү жана актуалдуулугу баса белгиленди.

Кыргызстандын делегациясы өз сөзүндө резолюциянын негизги максаты үй-бүлөдөгү зомбулуктун бардык түрлөрүн алдын алууга жана жоюуга багытталган дүйнөлүк стандарттарды калыптандыруу экендигин белгиледи.

Белгиленгендей, үй-бүлөдөгү зомбулук көйгөйүн чечүүгө багытталган резолюция БУУнун адам укуктары боюнча кеңешинин тарыхында биринчи жолу талкууланды ошондой эле бардык мүчө мамлекеттер тарабынан таанылып жана колдоого алынды.