Флоридадагы бороондон кийинки чыгымдын баасы 50 миллиард долларды түздү

АКШнын президенти Жо Байден "Милтон" бороонун зыяны 50 миллиард доллар экендигин билдирди. Бул туурасында чет элдик басылмалар жазышты.

Ак үй Байден жекшемби күнү Флоридадагы бороондон жабыркаган аймактарды кыдыра турганын билдирди.

Флориданын расмий өкүлдөрүнүн айтымында, учурда сел сууларынан, урандылардан жана башка аймактардан 1600дөн ашуун адам куткарылган.

Флориданын 2,2 миллиондон ашуун жашоочусу дагы эле электр жарыгысыз калууда.

Флоридадагы май куюучу жайлардын 29 пайызында күйүүчү май жок экендиги айтылууда. Ал эми Тампа менен Санкт-Петербург шаарларында 73 пайызды түздү.

Штаттын расмий өкүлдөрү, Флориданын Улуттук гвардиясынын 9 миң аскери издөө-куткаруу иштерин жүргүзүп, гуманитардык жардам көрсөтүп жаткандыгын айтышты.

Милтондо каза болгондордун саны өсүүдө. Ал эми Сарасота-Брадентон эл аралык аэропорту жабык боюнча калууда.

Белгилей кетсек, АКШнын Флорида штатында 9-октябрда катталган Милтон бороонунан 100дөн ашуун үй кыйраган. Бороон келгенге чейин Флорида бийлиги 5,5 миллион адамды эвакуациялоого чакырып, жарандар коопсуз аймакка 7-октябрдан баштап кете баштаган.