Рамзан Кадыров Грозныйдагы өлүм менен коштолгон жарылуу боюнча билдирүү жасады

Грозныйдагы 4 адамдын өмүрүн алган май куюучу станциядагы трагедияга күнөөлүүлөр мыйзам чегинде жазаланат. Бул тууралуу Чеченстандын башчысы Рамзан Кадыров өзүнүн тelegram-каналында билдирди.

Ал кырдаал жеке көзөмөлүндө экенин кошумчалап, каза болгондордун жакындарына көңүл айтты.

"Кырдаал менин жеке көзөмөлүмдө. Окуя болгон жерде ыкчам-тергөө тобу иштеп жатат. Окуянын бардык жагдайлары такталууда. Окуяга күнөөлүүлөрдүн баары эч кандай шексиз мыйзам чегинде жоопкерчиликке тартылат", — деп жазды ал.

Бүгүн, 12-октябрда Грозный шаарында май куючу жайдан өрт чыгып, анын кесепетинен жанындагы колледжде катуу жарылуу болгон. Орусиянын өзгөчө кырдаалдар министрлиги жарылуудан төрт адам каза болгонун, анын экөө жаш балдар экенин билдирди.