Шакиев Түштүк Кореянын Улуттук ассамблеясынын төрагасы менен баарлашты

Бүгүн, 14-октябрда Жогорку Кеңештин төрагасы Нурланбек Шакиев Ашхабад шаарында өтүп жаткан 5+1 форматындагы жолугушуунун алкагында Түштүк Кореянын Улуттук ассамблеясынын төрагасы Ву Воон-шик менен баарлашты.

Парламенттин басма сөз кызматынан билдиргендей, тараптар кыргыз-корей кызматташтыгынын учурдагы абалы тууралуу сөз кылып, парламенттер аралык байланыштарды өнүктүрүү боюнча да ой бөлүштү.

Шакиев Кыргызстан Түштүк Корея менен калыптанган алакаларды арттырууга кызыкдар экендигин белгилеп, анын ичинен социалдык-экономикалык, маданий-гуманитардык байланыштарды кеңейтүү зарылчылыгына токтолду.

Өз кезегинде Ву Воон-шик эки өлкө бардык багыттар боюнча жигердүү кызматташып келе жатканын эске салып, өнөктөштүктү өнүктүрүүгө багытталган долбоорлор арбын экенине токтолду.