Депутат окуучулардын тамагына бөлүнгөн акчаны көбөйтүүнү сунуштады

Жогорку Кеңештин депутаты Элдар Абакиров Билим берүү жана илим министрлигин окуучулардын тамагына бөлүнгөн каражатты көбөйтүүнү сунуштады. Бул тууралуу эл өкүлү парламенттин Транспорт, коммуникациялар, архитектура жана курулуш боюнча комитетинин бүгүнкү, 15-октябрдагы жыйынында айтты.

Эл өкүлү Абакиров билим берүү жана илим министри Догдуркүл Кендирбаевга кайрылып, окуучулардын тамагына күнүнө канча сом бөлүнөрүн сурады.

Министрдин айтымында, республикалык бюджеттен 1-4-класстын окуучуларынын тамагына күнүнө 14 сом бөлүнөт.

"Окуучулардын тамагына бир күндө 14 сом бөлөт экенбиз. Кечээ барып ал тамагын жеп көрдүм. Бул ботко жана кара чай болчу. Этке акча жетпейт экен. Ушул маселени дагы карап көрсөңүз. Көтөрүлсүн. Мүмкүн бир аз да болсо тоок эти кошулуп калсын. Анткени бул баланын ден соолугу", - деди депутат.

Ошондой эле ал окуучулардын тамактануусу алардын ден соолугуна жана билим алуусунда мааниси чоң экенин баса белгилеп өттү.