Ноокенде 52 жаштагы киши өспүрүм жээнине ыплас иш-аракеттерди жасаган деп кармалды

Ноокен районунда өспүрүм кызга карата ыплас иш-аракеттерди жасаган деп шектелген жаран кармалды. Бул тууралуу Ички иштер министрлигинен билдирди.

Маалыматка ылайык, милицияга Адыр-1 айылынын 52 жаштагы тургуну өзүнүн жээнине карата сексуалдык мүнөздөгү ыплас аракеттерди жасап жүргөндүгү боюнча маалымат келип түшкөн. Бул факты боюнча 12-октябрда Кылмыш-жаза кодексинин 158-беренеси (Ыплас аракеттер) менен кылмыш иши козголгон.

Белгилүү болгондой, өспүрүмдүн ата-энеси ажырашып кетип, кыз туугандарынын колунда калган. Тергөөнүн жүрүшүндө шектүү жаран 2023-жылдан баштап өсүрүм кызга карата бузуку аракеттерин жасап жүргөндүгү аныкталган.

Тергөөнүн жыйынтыгы менен 13-октябрда аталган кылмыш ишине шектүү катары 1972-жылы туулган Б.К. аттуу жаран кармалып, убактылуу кармоочу жайга киргизилген.

14-октябрда Ноокен райондук соту тарабынан шектүү эки айга камакка алынган.

ИИМ тараткан маалыматта өспүрүм кыздын канча жашта экендиги так айтылган эмес.