Түндүк Корея расмий түрдө Түштүк Корея менен биригүүдөн баш тартты

Түндүк Корея өлкөнүн жаңы конституциясы Түштүк Кореяны расмий түрдө “душман мамлекет” катары белгилей турганын ырастады. Бул тууралуу бүгүн, 17-октябрда DW басылмасы жазды.

Анда белгиленгендей, буга чейин Түндүк Корея менен Түштүк Кореяны бириктирген автомобиль жана темир жолдордун түндүк тилкелери жардырылган. Бул Түштүктү душман мамлекет катары так аныктаган Түндүк Кореянын конституциясынын талаптарына ылайык көрүлгөн сөзсүз жана мыйзамдуу чара болгон.

Ошентип, Түндүк Корея расмий түрдө Сеул менен биригүү идеясынан баш тартты. Түндүк Кореянын өзгөртүлгөн конституциясы тууралуу башка маалымат айтылган жок.

Түндүк Корея 15-октябрда Түштүк Кореяга баруучу жолдорду жардырганын Түштүк Кореянын "Рёнхап" маалымат агенттиги билдирген. Басылма бул жолдор мурда Кореялар аралык кызматташтыктын символу катары саналып келгенин жазган.