"Кайык менен өтүшөт". Депутат өкмөттөн Кызыл-Бейит айылынын көйгөйүн чечүүнү өтүндү

Бүгүн, 17-октябрда Жогорку Кеңештин жыйынында депутат Медер Алиев Жалал-Абад облусунун Кызыл-Бейит айылы тууралуу маселе көтөрдү.

Ал айылда дагы деле электр энергиясы жок экенин, жашоочулар Нарын дарыясынан кайык менен өтүп жатканын айтып, 21-кылымда мындай маселелер болбошу керектигин белгиледи.

"300дөй киши жашаган айылдын көйгөйү 21-кылымда дагы деле чечиле элек. Электр энергия, жол деген жок, жашоо шарты татаал. Окуучулар 30 чакырым аралыктагы Кара-Көл, Таш-Көмүр шаарларына барып окушат экен. Айыл эли Нарын дарыясынан өтүп туруу үчүн бир кайыкчыны жалдашыптыр. Акыркы 30 жылда 40 адам сууга чөгүп каза болуптур. Мындан улам "өкмөт бир кичинекей айылга кайык алып берип, кайыкчынын айылыгын төлөп бере албай койду" деген көйгөй жаралбай койбойт", - деген эл өкүлү өкмөттөн маселени чечүүнү өтүндү.