Израиль ХАМАСтын өлтүрүлгөн лидеринин акыркы мүнөттөрүндөгү видеону жарыялады

Израилдин Коргоо күчтөрү палестиналык ХАМАС кыймылынын жетекчиси Яхья Синвардын өлтүрүлүшүнө бир нече мүнөт калганда тартылган учкучсуз аппараттын кадрларын жарыялады.

Видеодо дрон Газа тилкесинин түштүгүндөгү кыйраган үйгө кирип баратканын, ал жерде жарадар болгон Синвардын башын кездемеге ороп отургучта отурганын көрүүгө болот. Ал дронду таяк сымал буюм менен чабууга аракет кылат.

Андан көп узабай имаратка израилдик күчтөр кол салган.

Кечээ, 17-октябрь күнү эртең менен Израиль 2023-жылдын 7-октябрында Израилге кол салуунун негизги уюштуруучусу деп эсептелген Синвардын жок кылынганын расмий жарыялаган.

ХАМАС бул маалымат боюнча азырынча комментарий бере элек.