Нурсултан Назарбаев белек кылган орден Улуу Британиянын сайтында сатылууда

Коңшу Казакстандын тунгуч президенти Нурсултан Назарбаевдин Улуу Британиянын мурдагы премьер-министри Маргарет Тэтчерге ыйгарган «Достык» ордени сатууга коюлду. Бул тууралуу чет элдик басылмалар жазышты.

Жарнамада Казакстандын мамлекеттик сыйлыгын 12 миң 500 фунт стерлингге сатып алуу сунушталган, бул дээрлик 1 миллион 392 миң сомго барабар.

"Баалуу таштар салынган төш жылдыз лентасындагы ордендин төш белгиси менен бирге көк кездеме менен капталган. "Достык" деген жазуусу бар ордендин кутусу бир аз эскирген, бирок абалы абдан жакшы", - деп айтылат ордендин сүрөттөмөсүндө.

Маргарет Тэтчерге "Достык" орденин 2001-жылы Нурсултан Назарбаев тапшырган. Казактардын бул ордени жарандар коомдогу өз ара ынтымакты сактоодогу үзүрлүү эмгеги, тынчтыкты, элдердин ортосундагы достукту жана кызматташтыкты чыңдоодогу кызматы үчүн сыйланат.