Депутат Жумабеков шайлоолорду иш күндөрү өткөрүүнү сунуштады

Жогорку Кеңештин депутаты Дастан Жумабеков шайлоолорду иш күндөрү өткөрүүнү сунуштады. Бул тууралуу ал бүгүн, 22-октябрда парламентте Конституциялык мыйзамдар, мамлекеттик түзүлүш, сот укук маселелер боюнча комитеттин жыйынында билдирди.

Эл өкүлү анда калктын электораттык активдүүлүгүн жогорулатуу жаатындагы маселелерди көтөрдү.

"Шайлоолор дем алыш күндөргө туш келет. Эл дем алыш күндөрү өз тиричилигин бүткөрүп алайын дейт. Бирөөлөр эс алат, башкасы бир жакка кетет, дагы бири конокко барат дегендей. Мындан улам шайлоолорду дем алыш күнгө дайындоо - калктын шайлоого активдүү катышпай жатканына себеп болууда деп эсептейм. Шайлоолорду иш күндөрүнө дайындасак кандай болот?" - деди Жумабеков.

Борбордук комиссиясынын төрайымы Нуржан Шайлдабекова анын сунушун колдой турганын айтып, көп өлкөлөрдө мындай практика бар экенин белгиледи.