Балбан Раззак Бейшекеев Албанияда тарыхый жеңишке жетип, Дүйнө чемпиону болду

Кыргыз балбаны Раззак Бейшекеев Албаниянын Тирана шаарында өтүп жаткан 23 жашка чейинкилер арасындагы Дүйнө чемпиондугунда алтын байге утту.

Дүйнө чемпиондугуна грек-рим күрөшү боюнча 67 килограмм салмакта катышкан кыргыз балбаны финалга чейин жетип, финалда грузиялык Гиорги Чхиквадзе аттуу балбан менен кез келди.

Бүйүр кызыткан финалдык беттеште Раззак Бейшекеев грузиялык балбанды 6:1 эсебинде жеңип, Дүйнө чемпиону болду.

Бул жеңиш Кыргызстандын тарыхындагы тарыхый жеңиш болуп калды. Буга чейин грек-рим күрөшү боюнча бир дагы кыргыз балбаны 23 жашка чейинкилер арасында алтын байге ута алган эмес.

Ал эми эркин күрөштө бул көрсөткүчкө Эрназар Акматалиев менен Улукбек Жолдошбеков жеткен.