Ошто мал уурулукка шектелип 31 жаштагы жаран кармалды

Ош облусунун Кара-Суу районунда мал уурдоого шектелген жаран изи сууй электе кармалды. Бул туурасында Ош ОИИБинин басма сөз кызматы билдирди.

Маалымдалгандай, 20-октябрда аталган райондун милиция бөлүмүнө Мады айыл аймагынын тургуну арыз менен кайрылган. Анда ошол эле күнү короосунда байланып турган 1 баш малын белгисиз адамдар уурдап кеткендигин билдирген.

Бул факты каттоого алынып, Кылмыш-жаза кодексинин 205-1-беренеси (Мал уурдоо) боюнча кылмыш иши козголуп, ыкчам тергөө амалдары башталган.

Жүргүзүлгөн ыкчам иштеринин натыйжасында шектүү катары Кара-Суу районунун 1993-жылы туулган К.уулу К. аттуу тургуну кармалып, камакка алынды.

Учурда тергөө иштери жүрүп жатат.