Депутат Бекешев кыргыз-казак чек арасындагы узун кезек боюнча маселе көтөрдү

Бүгүн, 23-октябрдагы Жогорку Кеңештин жыйынында депутат Дастан Бекешев кыргыз-казак чек арасындагы жүк ташуучу унаалардын кезеги боюнча маселе көтөрдү.

Жыйында Астана шаарында эки өлкөнүн өкмөттөрү кол койгон "Мамлекеттик чек ара аркылуу өткөрүү пункттары аркылуу макулдашууга өзгөртүү киргизүү" тууралуу протоколду ратификациялоо боюнча мыйзам долбоору каралып жаткан. Анда "Каркыра" өткөрүү пунктун күнү-түнү иштөө режимине өткөрүү каралган.

Ал жай айында кыргыз тарапта жүк ташуучу унаалардын узун кезеги жаралып жатканын айтып, буга эмне себеп болуп жатканына кызыкты.

"Бир жолу Токмоктун жанындагы чек арадан өтүп жатып, кезекте турган 147 унааны көрдүм. Мындай узун кезек эмнеден улам жаралып жатат? Маселе биз тараптабы же казак тараптабы?" - деди Бекешев.

Чек ара кызматынын директорунун орун басары Таалайбек Тажибаев чек арадан өткөрүү күндүзү гана ишке ашырылгандыктан көйгөй болуп жатканын айтып жооп берди.