"Ортомчулар кылууда". Депутат Сулайманов "Унаа" мекемесинин жетекчисине кеңеш айтты

Бүгүн, 23-октябрдагы Жогорку Кеңештин жыйынында депутат Кундузбек Сулайманов "Унаа" мамлекеттик мекемесинин директору Улан Карыпбековго коррупциялык иштер менен алектенген ортомчулардан арылууну тапшырды.

"Мекеме кандай жаманатты болуп жатканын көрүп жатасыз. Мунун баарын араңарда жүргөн ортомчулар кылып жатат. Мен бул жөнүндө мурунку жетекчиге дагы айткан элем. Ортомчуларды жок кылгыла. Муну өз колуңузга алыңыз", - деди ал.

Эске салсак, сентябрь айында аталган ишкананын 10 кызматкери коррупциялык иштерге шектелип кармалышкан. Ишкананын мурдагы директору Рустам Жокоев пара алган деген шек менен камакка алынып, кызматынан бошотулган.

1-октябрда Жокоевдин ордуна Карыпбеков Транспорт каражаттарын жана айдоочулук курамды каттоо боюнча мамлекеттик агенттиктин директору болуп дайындалган.