Жогорку соттун төрагасы болуп Медербек Сатыев дайындалды 

Президент Садыр Жапаров кол койгон жарлыкка ылайык, Жогорку соттун төрагасы болуп Медербек Сатыев дайындалды. Бул боюнча өлкө башчынын администрациясы бүгүн, 24-октябрда кабарлады.

Кечээ, 23-октябрда парламент Жогорку соттун төрагалыгына Сатыевдин талапкерлигин талкуусуз колдогон.

Сатыев 50 жашта. Кыргыз улуттук университетинин юридикалык факультетин бүтүргөн.

2020-жылдын октябрь айында Кыргызстандын президентинин аппаратынын жетекчисинин биринчи орун басары болуп дайындалган. Кийинчерээк Сот департаментинин директору, ал эми ушул жылдын январынан тарта Жогорку соттун судьясы болгон.

Белгилей кетсек, аталган кызматты Замирбек Базарбеков аркалап келген. Ал кызматтан кетүү тууралуу өзү жазган арызынын негизинде бошотулган.