"Кийинки жылы курулуп бүтөт". Каныбек Туманбаев "автовокзалдын абалы ушулбу" дегендерге жооп берди

Бишкек шаарында жаңы автобекет курула баштады. Бул тууралуу президенттин иш башкармасынын башчысы Каныбек Туманбаев Фейсбук баракчасына жазды.

Анда ал жаңы автобекеттин эскиздери менен бөлүшүп, курулуп жаткан автобекет бир жыл аралыгында элге бериле турганын билдирген.

"Урматтуу туугандар, Бишкек шаарынын жашоочулары. Биз жаңы автобекетти куруп баштадык, ага чейин убактылуу пайдаланып турууга автобекет мэрия даярдаган. Эки күндөн бери эле “кокуй, автовокзалдын абалы ушулбу!” деп талкуу жараткан блогерлерди байкап жатам. Башка өлкөнүн вокзалдары менен салыштырып, шылдыңдоо кылгандар дагы бар.

Элге шарт түзөлү, жаңы куруп берели деген максаттарыбызды айрымдар бурмалап, тепкиге алып жатасыздар. Мындай кылбаңыздар, уят, туугандар. Андан көрө элдин кызыкчылыгына багытталып жасалган жумуштарды колдоп турбайсыздарбы?! Сабыр кылып турсаңыздар, президентибиз тапшырма койгон, кийинки жылы жаркыраган автобекеттүү болосуздар", - деп жазган ал.